नॅब चिपळूण जिल्हा शाखे मार्फत१००% दृष्टीबाधित आदेश खंदारे यांचे व्यवसायिक पुनर्वसन

चिपळूण : नॅब चिपळूण जिल्हा शाखा, रत्नागिरी यांच्यावतीने लांजा तालुक्यातील बोरवले गावचे रहिवासी व १००% दृष्टिबाधित आदेश खंदारे यांचे व्यवसायिक पुनर्वसन यशस्वीपणे करण्यात आले आहे. खंदारे यांनी नॅबच्या माध्यमातून स्वयंसिद्धता व मसाज प्रशिक्षण पूर्ण केले असून, आता त्यांनी आपल्या गावात मसाज सेवा सुरू करण्याचा संकल्प केला आहे.

यासंदर्भात नुकत्याच झालेल्या कार्यक्रमात आदेश खंदारे यांना कांस्य थाळी मसाजर हे आधुनिक उपकरण प्रदान करण्यात आले. या वेळी नॅबचे अध्यक्ष सुचय अण्णा रेडीज, कार्यवाह निलेश भुरण, ॲड. विवेक रेळेकर, सलीम पालोजी, सतीश विरकर, प्रकाश पाथरे आणि भरत नांदगावकर यांच्यासह अनेक मान्यवर उपस्थित होते.

या प्रसंगी बोलताना अध्यक्ष सुचय रेडीज म्हणाले, “कोकणात विशेषतः रत्नागिरी जिल्ह्यात अनेक अंध बांधव मसाज व्यवसायाच्या माध्यमातून आपला उदरनिर्वाह चालवत आहेत. त्यांच्या या उपक्रमाला बळकटी देण्यासाठी नॅब नेहमीच कटिबद्ध आहे.”